نجوم لبنان يعلّقون على “مجزرة رفح”: صرخات بوجه الإبادة!
علّق نجوم لبنان على “مجزرة رفح” التي حصلت نتيجة القصف الإسرائيلي.
فكتبت النجمة إليسا: “الصور والأصوات من رفح ما رح تروح من بالي. الانسانية ماتت مبارح وصرلها من ٧ تشرين ميتة. يا رب لو شو ما صلينا قليل وشو ما طلبنا ما رح يكفي. ارحم هالناس والاطفال وارحم فلسطين. شو هالاجرام، هيدي الديمقراطية يللي عم تصدروا للعالم؟”
كما قالت النجمة هيفا وهبي: “يا رب ارحمهم ونجهم، ولا شعور ولا كلمة بيقدروا يوصفوا الي صار، حرام حرام. يا رب فرجينا انتقامك، قلوبنا موجوعة، قلوبنا مع فلسطين”.
بدورها، دعت النجمة ميريام فارس متابعيها على مواقع التواصل الاجتماعي لرفع الصلاة من أجل فلسطين، وذلك تفاعلاً مع أحداث مجزرة رفح، وكتبت:” خلّينا كلنا نوحّد صلواتنا ودعواتنا على روح الضحايا والأطفال الأبرياء، مثل ما هلق عم نعمل انا وجايدن”، مضيفة ميريام قائلةً: “يا ربي بشي أعجوبة توقّف اللي عم بصير”.
أمّا الفنان عامر زيان فكتب: “صباح الخير للجميع، بداية أسبوع جديد وأهداف جديدة ت نشتغل عليها، وأمنية وحيدة بالقلب… السلام والأمن والأمان!” وتابع زيان في تغريدة ثانية “الإجرام اللي عم نشوفو بحق الشعب الفلسطيني وأطفال فلسطين صعبة عقل بشري يتحمّلو. لازم الكل يصرخ صرخة إنسانية بوجه الإبادة اللي عم بتصير”.
كما كتبت النجمة نانسي عجرم: “كنت بتمنى كون عم صبّح عليكن وقلكن صباح الخير بس صور الأشلاء والقصف على الأبرياء بالمخيمات بتبكّي وما بتدل إلا عالشرّ اللي معبّا الكون. صار بدا معجزة لتتحرك ضمائر حكام العالم. ولوقتها ما في إلا الصلاة وصدى صريخ الأطفال”.
بدورها، كتبت الفنانة كارول سماحة: “أنا قلبي احترق وما عم بقدر استوعب! اللّي عم نشوفوا مش مشاهد بأفلام هي مشاهد من الواقع حتّى العقل ما بيستوعب إنها حقيقة… شو بعد في أكتر من هيك مجزرة وإجرام وإبادة حتّى العالم يتحرّك بوجه هالكيان المجرم؟”